ए ! गर्मी

त्यो चिसो चिसो मन्द मन्द बतास ठीक लाग्न थाल्यो । बिहान उठ्दा महसुस गर्न सकिने हुस्सु र कुहिरो अनि ती शीतका थोपाको यादले सताउन थाल्यो । बिहान ९ बजे उठ्दा पनि लाग्छ, अझै मलाई सिरक नै प्यारो । तर, आज बिहान ९ बजे ब्युँझिदा पनि, सूर्य आफ्नै टाउको माथि पुगिसकेछ, अनि सिरक, कुरै नगरौं, कता हो कता ।

महिना दिनसम्म ननुहाउने, चिसोमा शरीर माड्न कति सकस हुन्थ्यो, तर तिमीले नै मलाई एकाबिहानै ‘हरहर महादेव’ भन्ने गरायौ । भित्रीगन्जी, त्यसको माथि टिसर्ट अनि अझै त्यसको माथि ज्याकेट । कम्मरमुनि पनि तीनपत्र, अण्डरवेयर – ट्राउजर – पाइन्ट । अझै, टाउकोमा टोपी र गलामा मफलर । यतिधेरै भारी बोक्दा पनि सकस नहुने त्यो चिसोलाई याद दिलाउन सक्ने रैछौ, तिमी । तिम्रो आगमनमा आज बाहिर हिँड्डुल गर्दा एकपत्रे र घरमा नाङ्गै बस्न बाध्य बनाएका छौ ।

वर्षामा मात्र साथ दिने छाता पनि तिम्रो ताप छेक्न यहाँ प्रयोग भएका छन् । तिम्रो तापलाई भूल्न यहाँ एमोनिया ग्याँस उत्पादनसँगै पेयपदार्थ बिकेका छन् । तिम्रो तातोले आउने नूनिलो पानीको गन्ध मेटाउन, नानाथरी अत्तर छर्न थालेका छन् । तिम्रो तापले छाला कालो हुने डरले कैयौं क्रिम बिक्रि भएका छन् । तिम्रै कारणले आउने खटिरा निको पार्न, कैयन पाउडर बिकेका छन् । हुँदा हुँदा अहिले खाना रुच्न छाडेको छ । काम गर्ने जाँगर हराएको छ । तिमीले पछ्याइरहँदा आज छहारी खोज्दै हिँड्न परेको छ ।

तिम्रो आगमनमा झाडापखाला र हैजाका सरुवाध्यक्ष झिंगाले दिउँसै आक्रमण गर्छ । डेंगु, कालाजार जस्ता रोगका प्रतिपादक लामखुट्टेले रातमा आक्रमण गर्छ । तिन्लाई रोक्नकै निम्ति कैयन् पदार्थमाथि कालाबजारी भइरहेको छ । रातमा भर्खरै नुहाएर सुते पनि तिम्रो यादले पूरै ओछ्यान भिजिसकेको हुन्छ । तिम्रो कारण म बिरानो ठाउँमा यसै नढलौं भने कति बोतल पानी पिउनु परेको छ, के गर्नु यहाँको मान्छे पनि तिमी जस्तै निर्दयी भइसकेका छन् ।

गाउँघरमा सबैलाई बिहान झिसमिसेमै मेला पठाएका छौ रे । दिउँसो सबैलाई बातमार्ने समय दिँदै छहारीमा ल्याएका छौ रे । बालबच्चाहरुलाई सुन्दर नदीमा फाल हान्न बाध्य बनाएका छौं रे । सुन्छु, तिम्रै कारण महिलाहरु बिहान कि त साँझ पानी लिन डाँडा चढ्नु परेको छ रे । तराईतिर पनि तिमीले दुःख दिन थालेका छौ रे । सुन्छु, विद्यार्थीहरुलाई पढ्न अनि गरिखानेलाई काम गर्न बिहान र साँझको समय दिएका छौ रे । दिउँसो त तिम्रै कारण घरबाहिर निस्कन पनि हम्मेहम्मे पर्छ रे । कतिपय ठाउँहरुमा त तिम्ले आफ्नो शक्ति देखाउँदै कतिपयलाई स्वर्ग पठाएका छौं रे । अझ शहरमा त झन् कुरै नगरौं, तिम्रै कारण लुगा छोटिँदै गएको छ रे ! सेता साप्रा, वक्षस्थलको उँचो भाग र नाभिक्षेत्र स्पष्ट प्रदर्शन हुन थालेको छ रे ! कतिले त दिउँसै झुलको लुगापनि सिलाउन भ्याएको छ रे ! जे गर्छाै तिम्ले नै गर्छाै, अचम्म छौ तिमी पनि ।

धोएको लुगा पनि एकघण्टा भित्रै कति मजाले सुकाइदिएको छौं, एउटै भएपनि फाइदा त दियौ तर प्रत्येक दिन लगाको लुगा १० मिनेट भिजाउँदा भने मन खल्लो हुन्छ । टाउकोमा तेल लगाउनै पाइएको छैन, मुहारमा कुनै क्रिम दल्नै परेको छैन, तिम्रो कारण नूनिलो पानीको मूल जताततै फुटिरहेकै छ । दिनभर लगाएको लुगा बेलुका आफैलाई दूर्गन्धित लाग्छ । अझ कतै जुत्ता फुकालेर भित्र जान परोस्, मोजापनि सँगै फुकालेर अझै मिल्ने भए खुट्टा धोएरै प्रवेश गर्नपर्छ, हैन भने आफ्नै इज्जतको धज्जी उड्ने भएको छ ।

बिहानको खाना दिउँसै खान नहुने बनाका छौ । कहीकतैको यात्रामा आफै बाधा बनेका छौ । बच्चाहरुलाई आपसमा खेल्न भन्दा नदीसँग जोडेर राखेका छौ । बृद्धबृद्धालाई हावा हम्केर बस्न बाध्य बनाएका छौ । वयस्कहरुलाई जंगल पस्ने बाटो देखाएका छौं । काम गरि खानेलाई दिनदिनै नुहाउन बाध्य बनाएका छौ । हरेक प्राणीले तिमीलाई धिक्कार्ने समय आउँदा आउँदै पनि तिमी आफ्नो मर्जिमा रन्किरहेका छौं । वाह !

तिम्रै कारण कुनै दिन आकाशको चराहरुपनि फ्याट्फ्याट् खस्ने दिन नआओस् । तिम्रै कारण जमिनमा धाँजाहरु फुट्ने दिन नआओस् । अब त चाँडै बिदा लिने कोशिस गर, हैन भने हाम्रो आत्माहरुले पनि तिम्लाई धिक्कार्ने समय नजिकिँदै आएको छ । सुन्छु, कहिँकतै मूर्तिमा समेत पसिना आयो रे, लाग्छ यो पनि तिम्रो नै कुनै योजना हुनुपर्छ । वश् ! अति गर्नु अत्याचार नगर्नु रे ! अब तिम्लाई पनि भन्न मन छ, सोध्न मन पर्छ र तिमीसँगै बाजी थाप्न मन छ ।
ए ! गर्मी .... सक्छौं भने अब जाडोमा आएर देखाऊ ।।